Jamita Minggu IV dung Epiphanias , 2 Februari 2014 Mika 6:1-8

Jamita Minggu IV dung Epiphanias 

di HKBP Distrik IX Sibolga-Tapteng-Nias,  02 Pebruari 2014

“Mangulahon Uhum, Habasaon dohot Haserepon”

Mika 6:1-8

Oleh : Rukun Hutagalung

 

I.   Patujolo

Krisis Politik, sosial, ekonomi dohot Haporseaon (Iman) manghungkupi bangso Juda uju ginonggoman ni si Jotam, Ahas, dohot si Hiskia, gabe lam lumlam ma nang hasadaon ni bangso i, na pogos lam marpogos na lea lam marlea, alai sai dipukpuhi do patupa pelean situtungon tu Debata laho patupa hasesaan ni dosa atik pe parange nasida ndang mansohot sian hasomalan nasida ima na sai mangulahon nahinagigihon ni Debata, najumorbut dope sahat tu na mamelehon anak buhabajuna pe sanggup do nasida alai pangalaho tong sai manimbil sian lomo ni roha ni Debata. Tarhirim Debata dihamubaon ni roha ni Bangso i, gabe tumpol ma dihatahon Debata hirim ni rohaNai tu Bangso i, pola disuru naposoNa si Mika laho manurirangi/saksi tu nasida asa dipaandar angka dia ma na jat na niula ni Bangso i dohot na denggan na binahen ni Debata naung jinalo ni Bangso i. Jempek dohonon tona ni Debata tu nasida ima: “asa diulahon ma uhum dohot holong ni roha di habasaon, jala marpangalaho haserepon maradophon Debata”, holan ido hirim ni rohaNa sian Bangso hinaholonganNa i.

II. Hatorangan ni Turpuk

Ayat 1-2: “Masipatumpolan”. Dipungka Debata do sidang bolon maradophon Bangso Jehuda asa tung tangkas ditangihon jala dihatindanghon angka dolok angka pambahenan ni Debata tu nasida (Hesekiel 6:2-3), masitariasan do Debata dohot Bangso i patar songon indahan di balanga, soada na buni/hungkup di parkaro i, tung tedek do sude, alai dung masipatumpolan  nasida gabe patar ma hajahaton ni angka Panggomgomi ni Bangso i na sai manghagigihon hasintongan i dohot na sai papeolpeol uhum tu angka na pogos (bindu 3), “si miskin tetap bersalah” hira ima na masa di Bangso i gabe porsuk diahab nasida.

Ayat 3-5: “Nadenggan na binahen ni Debata”. Sejarah membuktikan, ndang adong na asing na paruarhon Bangso i sian parhatobanan Misir asing sian Debata sandiri (2 Musa. 12:31-42) marhite napinabangkitNa naposoNa si Musa, si Aron (2 Musa.7:1) dohot si Miriam (2 Musa 15:20-21), jala saleleng di halongonan Bangso i digohi do nasidaa marhite sipanganon dohot siinumon hombar tu tingkina, tung tangkas do auga nasida i dipaneang Debata.

Ayat 6-7: “Pertobatan yang Semu”. Sadar do Bangso i ujungna di angka na denggan na binahen ni Debata tu nasida, diparhatutu do pangalaho nasida na sai maralo tu lomo ni roha ni Debata, jala diokui nasida do na olo Debata marpangulahi mida pangalaho nasida i, gabe diparhatopot nasida ma pangalaho nasida di adopan ni Debata marhite na pasahathon Pelean  Parsombaon situtungon, mamelehon na ummarga di nasida tu adopan ni Debata marhitehite anak ni lombu, hambing na pinamokmok marriburibu hape ndang dijakhon Debata (Jesaya 1:11), miak na marloksa-loksa dohot anak buha baju, hape ndada i na pinagido ni Debata sian nasida, jala ndada pelean sisongoni laho tuhor ni nasa dosa niula nasida.

Ayat 8: “Mangulahon uhum dohot holong ni roha”. Sian saluhut pelan napinasahat ni Bangso i tu Debata dipanolsolionna ala dosana ndada apala pelean hambing tunggal na marriburibu (1 Samuel 15:22) alai naeng ma Bangso i mangulahon uhum, hasabamon  dohot haserepon ni roha, jala saluhut  Pelean  na ummangur di adopan ni Debata ima na mangulahon holong ni roha di bagasan hasintongan dohot hatigoran, ai  Holong ni roha i do godangan manghungkupi  angka dosa (1 Petrus 4:8), jala holong ni rohaido naumbalga sian haporseaon dahot panghirimon (1 Kor.13:13), nang parbue ni Tondi pe Holong ni roha i do patuduhononna (Gal.5:22).

III.Sipahusorhusoron

Hajongjonghon ma na denggan na binahen ni Debata dohot hatigoranNa marhite na mangulahon uhum dohot hasintongan dibagasan holong ni roha maradophon halak saluhut, jala hangoluhon hasabamon, hasatiaon  dohot haserepon ni roha dibagasan Kristus Jesus.                                                                        DMpoenyaMdsT