Jamita Minggu 9 Februari 2014 Mateus 5:13-20 Sira Dohot Panondang

 GABE SIRA DOHOT PANONDANG

Mateus 5 :13-20

Oleh : Pdt Sabar TP Siahaan STh,MBA

Boasa adong ahu? Tu aha do ahu dison? I do na naeng alusan ni turpuk on. Molo didok Jesus: “Hamu do sira ni tano on, hamu do panondang ni portibi on”, marlapatan do i, sasintong ni sintongna, mangolu pe hita, ima asa mangolu tu halak na asing do. Kita hidup adalah untuk orang lain. Aku hidup bukanlah untuk aku semata, tetapi aku ada untuk orang lain.

Sira ima sada sipanganon na sederhana. Alai ndang marguna sira i tu dirina sandiri. Alai marguna situtu do ibana molo dilehon ibana dirina tu na asing, ima tu sipanganon, marguna ma ibana mangalehon dai na tabo molo pas ukuranna, jala marguna ma ibana mengawetkan, unang busuk sipanganon. Tu halak na marsahit, marguna ma sira i gabe ubat. Tu suansuanan, marguna sira i gabe pupuk.

Songon i do nang palito. Molo ditutup i holan tu dirina, ndang marguna i. Alai molo diungkap ibana dirina tu na asing, disi ma ibana marguna situtu gabe panondang, patuduhon dalan, unang lilu manang tarrobung, huhut patuduhon angka na hurang denggan, gabe botoon paturehon.

Ala ni i, molo didok Jesus dison: “hamu do sira dohot panondang” na marsuru hita do i asa sude siihuthon Kristus olo mamake jala mangalehon ngoluna tu haporluan ni halak na asing. Hidup kita menjadi berarti bila kita mau memberikannya untuk orang lain. Ala ni i do, mansai luar biasa do ayat on, jamita ni Jesus di dolok on. On ma na digoari Golden Word, Sabda kencana, kata-kata emas.

Hamu angka dongan!

Molo tapamanat panompaon ni Debata di angka jadijadianNa i, taida ma, sude do i marasingasing be. Boasa marasingasing i dibahen Debata? Ima asa sude na tinompa i SALING MEMBUTUHKAN, saling memberi dan saling menerima satu sama lain. Asa, sian i ma taida, ditompa Debata do hita ndada holan asa marguna tu dirinta, alai justru asa marguna tu halak na asing do. Molo marsaripe sahalak baoa dohot sahalak boruboru, hape marasing be do nasida, ima ma na mambahen nasida ingkon saling membutuhkan; si suami mangolu laho tu pardihutana, jala si isteri mangolu laho tu sinondukna. I do hasingkopon nasida.

Dilehon Jesus do diriNa gabe tiruan taringot tusi. Na ro do Jesus jala mamelehon diriNa ndada tu diriNa, ndada ala kepentinganNa, alai saluhutna i dipatupa Ibana holan ala ni jolma, demi kepentingan ni hita pardosa. Pola didok: Na ro do Ibana mangalehon hosaNa gabe tobus ni torop halak. Jesus ma na tutu situtu mangulahon nanidokNa, ima gabe Sira dohot gabe Panondang tu halak na asing.

Hamu angka dongan!

Nuaeng, boha ma hita mangulahon i?

1. Marguna do sira laho mengawetkan. Unang busuk ikan, jolo tasirai do. Sira berfungsi manjagahon habusuhon (mencegah kebusukan). On do tugas ni angka na porsea. Disuru Jesus hita tu portibi on manjaga asa unang busuk portibi on, ai nunga dibusuhi sibolis dohot dosa. Tarlobi portibinta nuaeng, na gok haulion, gok kemewahan, jala na modern on, alai nunga gok habusuhon. Pangalaho nunga lam lumlam, ala ni hajahaton na martimburak, tondi egoisme dohot individualisme nunga mangararati. Nunga torop jolma gabe drakula, mangonsop mudar ni donganna. Torop gabe pencabut nyawa, ai mansai mura nuaeng on masimatean. Angka pejabat mambuat jatah ni angka na pogos. Narkoba merajalela, songon i nang juji pe. Tung so hagoaran be ala ni lumlamna.

Ra pintor halak do salahononta molo masa angka i. Hape satingkosna, ndang songon i. Ai hajahaton na masa di masyarakat i ndang na ro boti i. Alai hajahaton na masa di masyarakat i ima parbue ni keluarga. Keluarga do masinna. Molo masa hajahaton di masyarakat, sian anggota keluarga do na patupa i. Ala ni i, sada tugas na ingkon ulaonta, ima manaburhon sira di tonga ni keluarga. Sira ni angka natoras ma na ingkon manjagahon asa unang busuk angka anakkonna. Angka anak na umbalga ma manaburhon sira unang busuk angka anggina. Ala ni i, amang, inang dohot sude hita, tung parade dirim gabe sira na denggan.

2.      Sira marguna mangalehon dai na tabo. Adong hata na mandok: Bagaikan sayur tanpa garam, na patuduhon, ndang mardai molo so adong sirana. Ganup mangan halak Batak di pesta sai didok do: “Baen sira na i….” Adong do muse dai sira. Ala ni i, molo didok Jesus: hamu do sira ni tano on, marlapatan do i, ingkon sude ma hita paturehon dirinta mangalehon dai na tabo tu dongan.

Hamu angka dongan! Ulina i ngolu on molo manang didia hita hundul pintor las roha ni jolma, aman dihilala, lambok jala sonang panghilalaanna; molo ro hita gabe dapotan gogo dohot semangat na imbaru angka dongan; angka naung galegale gabe dapotan gogo, angka naung patah semangat gabe marhiras ni roha, angka naung tungki hian gabe boi dirgak dungkon ro hita. Ulina i tahe ngolunta on, molo tung torop halak masihol di haroronta. I ma halak naung pature dirina gabe sira. Alai hansitna i ngolu on, molo ganup ro hita, pintor tahutan halak, manang muruk, manang gabe was-was. Manang gabe lomoan roha ni halak molo ndang ro hita.

Ala ni i tung tapingkiri ma, aha ma sibahenonta asa haroronta di jabu, di gareja, di parpunguan manang di dia pe, manang na di lambung ni sinondukmu, manang pardihutam, manang ianakkonmu sai pintor lomo jala las rohanasida.

Ra boi do marhite SENYUM. Ternyata, Bunda Teresa na terkenal i pe mandok: paboa senyum i boi do i gabe ubat na mansai denggan tu halak. Mardalan ma sahalak ina di dalan. Tung murhing, tungki, sai hira na ponjot rohana. Asal didalani do dalan i boti. Alai di tongan dalan, pajumpang ma ibana dohot sahalak sintua ina. Minar bohi ni sintua ina i, senyum na i mansai uli, mangalehon las ni roha dohot semangat. Disise sintua ina i ma inanta nangkin. Holan disise pintor marganti ma bohi ni inanta i, gabe dohot minar, rohana pe pintor las idaon. Boasa? Ima ala diida senyum ni sintua i. Ra senyum ni inanta di jabu boi mangambolongkon loja dohot boban na dokdok na di roha ni amanta sian karejona. Senyum ni ina di jabu boi mangalehon semangat belajar dohot karejo tu ianakkonna. Alai bohim na murhing i, apalagi soara na sai marbetebete i, boi do i manambai habusuhon.

Ra boi do hita gabe sira marhite hata na lambok, sapaan yang manis, dan sentuhan yang penuh kasih, na haruar sian roha parbagasan. Boi do i mambahen angka roha na mandele gabe margogo.

Hamu angka dongan! Tajaha ma jolo annon di jabu, 2 Raja-raja 2, 19 – 22. Di zaman ni panurirang Elisa, di huta Jeriko, huta na uli, alai aekna paet jala ason, jala sangat berbahaya, ai mambahen angka ina gabe keguguran (santabi). Aha ma dibahen panurirang i? Didok ibana: Buat hamu sada saoan (pinggan), jala bahen sira tusi. Dung i disaburhon panurirang i ma sira i tu aek i, gabe denggan ma aek i, jala tabo.

Hamu angka dongan ! Adong panurat mandok, songon i ma keadaan ni bangsonta nuaeng, Uli do nian negerinta on, alai gabe berbahaya, songon naung ginoaran nangkin. Alai didok panurat on, boasa boi masa angka i? Ndang boi salahononta halak.Alai didok ibana, masa angka i ala jotjot do hita halak Kristen gagal gabe sira. Boasa? Ala jotjot hita holan mangurus dirinta. Gagal hita gabe sira ala lemba hita, mabiar manurangi, mabiar paboahon hasintongan, mabiar menegor kesalahan ni bangso on. Hape asa boi hita gabe sira na marguna, ingkon haruar do hita jala borhat tu tongatonga ni masyarakat. Ala ni i, didok panurat i, ingkon jumolo dirinta tahobasi, tapature, taparade gabe sira na denggan, marusaho mendisplinkan diri asa totop mardalan di dalan hasintongan ni Debata. Dung i nangetnanget tasirai ma angka na humaliang hita. 

3.      Panondang marguna patuduhon dalan, gabe malua halak sian parmaraan. Sai taboan do sulu, manang palito, manang senter, manang lampu molo mardalan hita, asa unang tartuktuk, unang tarrobung, unang tartombom. I ma guna ni panondang.

Molo dijou Jesus hita asa gabe panondang, ingkon paradeonta ma dirinta boi mangurupi halak asa unang tarrobung, tartuktuk manang tartombon. Toropna i halak, tarlobi ianakkonta nuaeng na mamorluhon i. Ai mansai godang ditawarhon portibi on angka dalan, angka siulaon, na mansai menarik, jala gogo manait roha. Angka halak na so tangkas mamingkiri dohot mananda i, boi do pintor madabu, dung i tarjorat ma disi, laos mate disi. I ma angka narkoba, juji, pergaulan bebas, ngolu na ugal-ugalan, dohot na asing. Dison ma ganup hita ringkot gabe panondang, patuduhon dalan, asa diboto nasida, dia do dalan na tingkos, dia do dalan na sala. Pangajarion, pembekalan rohani, pembekalan budi pekerti dohot etika tu sundut na umposo, ima dalanta gabe panondang tu nasida.

4.      Panondang marguna patudu na sala. Molo golap, ndang botoon na kotor manang na ias. Alai holan masuk cahaya, panondang, pintor tarida ma nang abu/orbuk pe, gabe botoon ma paturehon/ paiashon.

Ima ulaonta molo dijou gabe panondang. Godang halak na so menyadari naung sala naniulana. Ai torop nuaeng di masyarakatta halak na mapitung, na so umboto angka dalan na sala nanidalananna. Gariada tahe godang do manghilala na jumago ibana sian halak na asing molo diula ibana na sala i. Disi ma ingkon patuduhononta dosana. Songon panurirang Natan napatudu dosa ni si Raja David ( tajaha di 2 Samuel 12) gabe ditanda si David ma dosana, dung i diboto manopoti. Molo olo hita gabe panondang na patudu hasalaan ni halak jala paingothon, godangna i halak na gabe mananda dosana jala na olo mulak tu Debata.

 Hamu angka dongan! I ma gunana hita adong di portibi on. Marguna tu halak na                                  asing.Molo ndang boi be songon i, tudos ma hita tu sira na hambar, siambolonghonon sambing, manang tu palito natinutupan ni ampang, na so marguna, na ingkon siambolongkonon nama. Hamu do sira dohot panondang ni portibi on. Amen.